0

جموں وکشمیر: وزیر اعظم نریندر مودی کل سونہ مرگ میں زیڈ موڑ ٹنل کا افتتاح کریں گے

سری نگر، 12 جنوی (یو این آئی) وزیر اعظم نریندر مودی کل یعنی پیر کی صبح دس بجے وسطی کشمیر کے ضلع گاندربل کے سونہ مرگ میں زائد از 27 سو کروڑ روپیوں کی لاگت سے تیار زیڈ موڑ ٹنل کا افتتاح کریں گے۔یہ وزیر اعظم کا سال 2025 میں جموں و کشمیر کا پہلا دورہ ہوگا۔انہوں نے ہفتے کی شام ‘ایکس’ پر اپنے ایک پوسٹ میں کہا: ‘جموں وکشمیر کے سونہ مرگ میں زیڈ موڑ ٹنل کا افتتاح کرنے کے لئے بے صبری سے انتظار کر رہا ہوں’۔

ذرائع کے مطابق وزیر اعظم اس موقع پر ان تعمیراتی کارکنوں سے بھی ملاقات کریں گے جنہوں نے مشکل حالات میں اس منصوبہ کو کامیابی سے ہمکنار کیا۔انہوں نے کہا کہ وزیر اعظم ٹنل کا افتتاح کرنے کے بعد ایک عوامی ریلی سے بھی خطاب کریں گے۔

حکام کے مطابق 27 سو کروڑ روپیوں کی لاگت سے تیار 6.4 کلو میٹر طویل زیڈ موڑ ٹنل سے سری نگر سے سونہ مرگ تک سال بھر بلا تعطل رابطہ قائم رہے گا اور اس کے علاوہ مقامی تجارت اور سیاحت کو بھی فروغ ملے گا۔انہوں نے کہا کہ یہ ٹنل سری نگر اور لیہہ کے درمیان سفر کے وقت میں کمی کا باعث بن جائے گی اور اس سے تھاجیواس گلیشئر تک بہتر رسائی اور سندھ دریا پر وائٹ واٹر رافٹنگ کی سہولت فراہم ہوگی۔ان کا کہنا ہے کہ یہ ٹنل اسٹراٹیجک لحاظ سے ایک اہم منصوبہ ہے جو سال بھر ہر موسم میں رابطہ فراہم کرے گا۔اس ٹنل میں مین ٹنل، متوازی ایمرجنسی سرنگ اور ہوا کی نکاسی کے لئے بھی سرنگ شامل ہے۔

وزیر اعلیٰ عمر عبدللہ نے وزیر اعظم کے دورے کے پیش نظر کی جارہی تیاریوں کا جائزہ لینے کے لئے ہفتے کے روز سونہ مرگ کا دورہ کیا اور وہاں پولیس اور سول انتظامیہ کے افسروں کے ساتھ میٹنگ کی۔دریں اثنا وزیر اعظم کے دورے پیش نظر سری نگر سمیت وادی میں سیکورٹی کے کڑی انتظامات کئے گئے ہیں۔ضلع گاندربل کے سونہ مرگ اور گگن گیر کو فوجی چھائونی میں تبدیل کیا گیا ہے اور گگن گیر کے پہاڑی علاقوں میں بھی این ایس جی کمانڈوز کے ساتھ ساتھ فوج کی تعیناتی عمل میں لائی گئی ہے۔

سونہ مرگ ، گگن گیر اورکنگن تک 20 کلومیٹر حدود علاقے کو سیکورٹی فورسز نے پوری طرح سے سیل کیا ہے اور ٹنل کے نزدیک کسی بھی عام شہری کو جانے کی اجازت نہیں دی جارہی ہیں۔

اس خبر پر اپنی رائے کا اظہار کریں

اپنا تبصرہ بھیجیں