سری نگر:۹، اکتوبر : سپریم کورٹ آف انڈیا، جموں و کشمیر کی ریاست کا درجہ بحال کرنے کی درخواستوں پر جمعہ کو سماعت کرے گا۔جے کے این ایس کو ملی تفصیلات کے مطابق جموں و کشمیر کی ریاست کا درجہ بحال کرنے کی درخواستیں سیریل نمبر 17 میں چیف جسٹس آف انڈیا کی عدالت کے سامنے درج ہیں۔ درخواست گزاروں کے ایک قانونی صلاح کار ایڈوکیٹ صیب قریشی نے کہا کہ یہ کیس10 اکتوبر2025 کو چیف جسٹس آف انڈیا کی سربراہی میں بنچ کے سامنے سماعت کےلئے درج ہے۔انہوں نے کہا کہ یونین آف انڈیا نے ابھی تک اس معاملے پر کوئی جواب داخل نہیں کیا ہے۔14 اگست2025 کو جموں و کشمیر کو ریاست کا درجہ بحال کرنے کی درخواست کی سماعت کے دوران سپریم کورٹ نے کہا تھا کہ زمینی حقیقی صورتحال پر غور کیا جانا چاہیے اور پہلگام حملے جیسے واقعات کو نظر انداز نہیں کیا جا سکتا۔چیف جسٹس آف انڈیا بی آر گاوائی اور جسٹس کے ونود چندرن پر مشتمل بنچ نے کہا تھا کہ آپ کو زمینی حقائق کو بھی مدنظر رکھنا چاہیے۔ پہلگام میں جو کچھ ہوا اسے آپ نظر انداز نہیں کر سکتے۔درخواست گزاروں کا موقف ہے کہ ریاست کا درجہ بحال کرنے میں مسلسل تاخیر وفاقیت کے اصول کی خلاف ورزی ہے جو کہ آئین کے بنیادی ڈھانچے کا حصہ ہے۔انہوں نے یہ بھی عرض کیا ہے کہ سپریم کورٹ کی دسمبر 2023 کی ہدایت پر عمل درآمد کے لئے کوئی واضح ٹائم لائن مرتب کرنے یا اس پر عمل درآمد کرنے کے لیے کوئی قدم نہیں اٹھایا گیا ہے کہ ریاست کی بحالی جلد از جلد اور جلد از جلد ہوگی۔
0
