نئی دہلی، 14 اپریل (یو این آئی) صدر جمہوریہ دروپدی مرمو، نائب صدر جگدیپ دھنکھر، لوک سبھا کے اسپیکر اوم برلا، وزیر اعظم نریندر مودی اور دیگر معززین نے پیر کو ڈاکٹر بھیم راؤ امبیڈکر کو ان کی 134 ویں یوم پیدائش پر پارلیمنٹ احاطے میں پریرنا استھل میں گلہائے عقیدت نذر کئے۔
مرکزی وزراء کرن رجیجو، ارجن رام میگھوال، پیوش گوئل، رکن پارلیمنٹ اور حزب اختلاف کے لیڈر راہل گاندھی، کانگریس پارلیمانی پارٹی کی چیئرپرسن سونیا گاندھی، کانگریس صدر ملکارجن کھڑگے، دہلی کی وزیر اعلیٰ ریکھا گپتا اور دیگر لیڈروں نے بھی ڈاکٹر امبیڈکر کو خراج عقیدت پیش کیا۔
اس سے پہلے مسٹر مودی نے اپنی پوسٹ میں کہا’’تمام ہم وطنوں کی طرف سے، میں بھارت رتن بابا صاحب کو ان کی یوم پیدائش پر نمن کرتا ہوں۔‘‘
انہوں نے مزید کہا ’’ان کی تحریک کی وجہ سے ہی آج ملک سماجی انصاف کے خواب کو پورا کرنے میں لگن کے جذبے سے لگا ہوا ہے۔ ان کے اصول اور نظریات ایک خود کفیل اور وکست بھارت کی تشکیل کو طاقت اور رفتار فراہم کریں گے۔‘‘
امبیڈکر جینتی 14 اپریل کو ہندوستانی سیاست دان اور سماجی مصلح بی آرامبیڈکر کی یاد میں منائی جاتی ہے۔ باباصاحب ڈاکٹر امبیڈکر نے سماج کے پسماندہ طبقات کے خلاف سماجی اور ذات پات کے امتیاز کو ختم کرنے کے لیے پوری زندگی ثابت قدمی سے کام کیا۔ ایک چھوٹے آغاز سے وہ آزاد ہندوستان کے پہلے وزیر قانون اور انصاف بن گئے۔ انہیں 1990 میں بعد از مرگ ہندوستان کے اعلیٰ ترین شہری اعزاز، بھارت رتن سے نوازا گیا۔
0
