سری نگر6 فروری (یو این آئی)نیشنل کانفرنس کے ترجمان اور انچارج کانسچونسی کولگام عمران نبی ڈار نے بہی باغ کولگام جاکرفوجی اہلکار کے گھر والوں سے تعزیت پُرسی کی اور مرحوم کے لواحقین کی ڈھارس بندھائی۔
انہوں نے اس موقعے پر کہا کہ نیشنل کانفرنس اس قتل کی مذمت کرتی ہے اور اس کے خاندان کو مکمل تعاون کا یقین دلاتی ہے۔
ان کا کہنا ہے کہ پارٹی صدر ڈاکٹر فاروق عبداللہ اور وزیر اعلیٰ عمر عبداللہ کی ہدایت پر سوگواران کی ڈھارس بندھائی ،تعزیت پُرسی کی اور اظہارِ یکجہتی کیا۔
انہوں نے کہاکہ “یہ ایک افسوسناک واقعہ ہے، اور ہم اس کی شدید مذمت کرتے ہیں۔ نیشنل کانفرنس اس طرح کے تشدد کے خلاف کھڑی ہے۔ہمیں امید تھی کہ ایسے واقعات رونما نہیں ہوں گے لیکن بدقسمتی سے ایسا ہوا ہے۔
ان کے مطابق میں سیکورٹی اداروں سے درخواست کرتا ہوں کہ اس معاملے کی مکمل تحقیقات کریں۔ حکومت اور لیفٹیننٹ گورنر کو منصفانہ تحقیقات کو یقینی بنانا چاہیے۔“
حملے کے بعد گرفتاریوں پر تبصرہ کرتے ہوئے انہوں نے کہا کہ واقعے کے بعد سے کریک ڈاون جاری ہے، جس میں 500 کے قریب نوجوانوں کو پکڑے جانے کی اطلاعات ہیں۔”ہم تحقیقات میں مداخلت نہیں کریں گے، لیکن ہم پولیس پر زور دیتے ہیں کہ وہ اس بات کو یقینی بنائے کہ کسی بے گناہ کو حراست میں نہ لیا جائے۔
ان کا مزید کہنا تھا کہ تحقیقات منصفانہ اور شفاف ہونی چاہئیں۔ترجمان نے غمزدہ خاندان کو یقین دلایا کہ نیشنل کانفرنس ہر ممکن تعاون کرے گی۔
0
