0

کشمیر میں گرو ہر گوبند جینتی مذہبی جوش و خروش سے منائی گئی

سری نگر، 22 جون (یو این آئی) وادی کشمیر میں ہفتے کو سکھ مت کے چھٹے گرو ہرگوبند سنگھ جی کا یوم پیدائش یا پرکاش پرو انتہائی جوش و خروش اور مذہبی عقیدت و احترام کے ساتھ منایا گیا۔
ہفتے کی صبح سے ہی سکھ برادری سے وابستہ عقیدت مندوں کا گردواروں اور دوسرے مذہبی مقامات پر تانتا بندھا رہا۔
وادی میں گرو ہرگوبند سنگھ کے جنم دن کے سلسلے میں سب سے بڑی تقریب گرمائی دارالحکومت سری نگر میں کوہ ماراں کے دامن میں واقع سکھوں کے مشہور چھٹی پادشاہی گردوارہ میں منعقد ہوئی جہاں حضرت محبوب العالم شیخ حمزہ مخدومی (رح) کی زیارت گاہ اور شاریکا دیوی کا مندر نزدیک میں ہی واقع ہیں۔
سکھ عقیدت مندوں کی بڑی تعداد، جس میں خواتین، بوڑھے اور بچوں کی خاصی تعداد شامل تھی، نے صبح سویرے سے ہی اس گردوارے پر حاضری دینا شروع کی تھی۔
اس موقعے پر سکھ عقیدت مندوں کے لئے خصوصی لنگر کا بھی اہتمام کیا گیا تھا۔
ایک عقیدت مند نے میڈیا کو بتایا کہ پوری دنیا کی طرح کشمیر میں بھی آج گرو ہر گوبند جی کی جینتی منائی جا رہی ہے۔
انہوں نے کہا کہ کشمیر میں روایتی انداز میں اس بڑے دن کو منایا جاتا ہے جس میں یہاں دیگر مذہب سے وابستہ لوگ بھی شامل رہتے ہیں۔
ان کا کہنا تھا کہ انتظامیہ نے امسال بھی عقیدت مندوں کے لئے اچھے انتظامات کئے ہیں۔
ایک اور عقیدت مند نے بتایا کہ گرو ہر گوبند جی ایک عظیم گرو تھے جن کی عظمت کا ڈنکا دنیا بھر میں بجتا ہے۔
انہوں نے کہا: ؛گروجی نے ہمیں سکھایا کہ مسائل جنگ سے نہیں بلکہ آپسی بھائی چارے اور پیار و محبت سے حل کئے جا سکتے ہیں۔
چھٹی پادشاہی گردوارہ تقریب کی طرز پر بارہمولہ، ترال، جواہر نگر، صنعت نگر ، برزلہ اور وادی کے دوسرے مقامات پر بھی تقاریب کا انعقاد عمل میں آیا۔
اطلاعات کے مطابق جموں میں بھی گرو ہرگوبند سنگھ جی کا جنم دن انتہائی جوش و خروش کے ساتھ منایا گیا ہے۔
اس موقع پر شہر کے تمام گردواروں میں خصوصی تقریبات کا انعقاد کیا گیا ہے۔ صوبے کے دوسرے اضلاع بشمول ادھم پور، کٹھوعہ اور سانبہ میں بھی خصوصی تقریبات کا انعقاد کیا گیا ہے۔

اس خبر پر اپنی رائے کا اظہار کریں

اپنا تبصرہ بھیجیں