0

کشمیر میں 2 اور 3 نومبر کو موسم ناساز ہونے کا امکان:محکمہ موسمیات

سری نگر، 31 اکتوبر (یو این آئی) خشک موسم کے بیچ محکمہ موسمیات نے وادی کشمیر میں 2 نومبر کوخاص طور پر پہاڑی علاقوں میں موسم خراب ہونے کی پیش گوئی کی۔متعلقہ محکمہ کے ایک ترجمان نے بتایا کہ جموں و کشمیر میں یکم نومبر کو موسم جزوی ابر آلود مگر خشک رہ سکتا ہےانہوں نے کہا کہ وادی کے پہاڑی علاقوں میں 2 اور 3 نومبر کو کہیں کہیں ہلکی بارشوں یا برف باری کا امکان ہے۔ان کا کہنا تھا کہ بعد ازاں وادی میں 4 سے 6 نومبر تک موسم ایک بار پھر خشک رہنے کی توقع ہے۔ ترجمان کے مطابق گرمائی دارلحکومت سری نگر میں کم سے کم درجہ حرارت4.6 ڈگری سینٹی گریڈ ریکارڈ ہوا ہے۔
وادی کے شہرہ آفاق سیاحتی مقام گلمرگ میں کم سے کم درجہ حرارت 4.0 ڈگری سینٹی گریڈ جبکہ وادی کے دوسرے مشہور سیاحتی مقام پہلگام میں کم سے کم درجہ حرارت 0.8 ڈگری سینٹی گریڈ ریکارڈ ہوا ہے۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 3.0 ڈگری سینٹی گریڈ ریکارڈ کیا گیا جبکہ سرحدی ضلع کپوارہ میں کم سے کم درجہ حرارت3.1 ڈگری سینٹی گریڈ ریکارڈ کیا گیا۔
دریں اثنا ساز گار موسمی حالات کے بیچ وادی کشمیر کو ملک کے باقی حصوں کے ساتھ جورنے والی سری نگر – جموں قومی شاہراہ پر ٹریفک کی نقل و حمل حسب معمول جاری ہے۔
جنوبی کشمیر کے ضلع شوپیاں کو صوبہ جموں کے راجوری اور پونچھ اضلاع کے ساتھ جوڑنے والے تاریخی مغل روڈ اور سری نگر- لیہہ شاہراہ پر بھی ٹریفک بغیر کسی خلل کے رواں دواں ہے۔

اس خبر پر اپنی رائے کا اظہار کریں

اپنا تبصرہ بھیجیں