سری نگر،16دسمبر(یو این آئی) جموں و کشمیر کے باصلاحیت تیزگیندباز عاقب نبی نے آئی پی ایل 2026 کی نیلامی میں تاریخ رقم کر دی، جب دہلی کیپٹلز نے انہیں 8 کروڑ 40 لاکھ روپے میں اپنی ٹیم میں شامل کیا۔ محض 30 لاکھ روپے کی بنیادی قیمت کے ساتھ نیلامی میں اترنے والے عاقب نبی کے لیے دہلی کیپٹلز، رائل چیلنجرز بنگلورو اور سن رائزرس حیدرآباد کے درمیان سخت مقابلہ دیکھنے کو ملا، تاہم آخرکار دہلی کیپٹلز نے بازی مار لی۔
بارہمولہ میں 4 نومبر 1996 کو پیدا ہونے والےعاقب نبی کا تعلق ایک متوسط گھرانے سے ہے۔ ان کے والد غلام نبی ڈار ایک سرکاری اسکول میں انگریزی کے استاد ہیں اور ابتدا میں چاہتے تھے کہ بیٹا ڈاکٹر بنے، تاہم عاقب کے کرکٹ کے جنون نے بالآخر انہیں اپنے خواب کے پیچھے کھڑا کر دیا۔
دائیں ہاتھ کے میڈیم فاسٹ بولر عاقب نبی اپنی سوئنگ، لائن و لینتھ پر غیر معمولی کنٹرول اور دونوں جانب گیند موڑنے کی صلاحیت کے لیے جانے جاتے ہیں۔ انہوں نے اپنی بولنگ ایکشن جنوبی افریقہ کے عظیم فاسٹ بولر ڈیل اسٹین سے متاثر ہو کر اپنائی، جنہیں وہ بچپن سے اپنا رول ماڈل مانتے آئے ہیں۔ حالیہ برسوں میں وہ جسپریت بمراہ کی بھی کھل کر تعریف کرتے ہیں۔
عاقب نبی نے باقاعدہ کرکٹ کا آغاز اسٹریٹ کرکٹ اور ٹینس بال میچوں سے کیا۔ بارہمولہ میں اس وقت مناسب کوچنگ سہولیات نہ ہونے کے باعث انہوں نے 19 سال کی عمر کے بعد ریڈ بال کرکٹ کھیلنا شروع کیا۔ ایک دوست کے ساتھ محض آزمائش کے لیے اسٹیٹ ٹرائلز میں شرکت کے دوران ان کا انتخاب ہو گیا، جو ان کے کیریئر کا ٹرننگ پوائنٹ ثابت ہوا۔
انہوں نے 2019-20 میں سید مشتاق علی ٹرافی کے ذریعے جموں و کشمیر کے لیے ڈیبیو کیا۔ اب تک وہ 27 ٹی20 میچوں میں 28 وکٹیں حاصل کر چکے ہیں۔ 2024-25 رنجی ٹرافی میں انہوں نے 44 وکٹیں لے کر دوسرے سب سے کامیاب بولر کا اعزاز حاصل کیا، جبکہ 2025 دلیپ ٹرافی میں ایک ہی اوور میں چار گیندوں پر چار وکٹیں لے کر قومی سطح پر شہ سرخیوں میں آئے۔
2025-26 سید مشتاق علی ٹرافی میں بہار کے خلاف ایڈن گارڈنز میں 4 وکٹیں 16 رنز دے کر حاصل کرنا بھی ان کی شاندار کارکردگی کا ثبوت ہے۔
عاقب نبی کی آئی پی ایل میں شمولیت نہ صرف ان کے ذاتی سفر کی کامیابی ہے بلکہ جموں و کشمیر کرکٹ کے لیے بھی ایک تاریخی لمحہ تصور کیا جا رہا ہے۔
0
