جموں،18جنوری(یو این آئی) سانبہ سیکٹر میں ہفتے کی شام بین الاقوامی سرحد کے نزدیک پاکستانی ڈرون کی مشتبہ نقل و حرکت نے پورے علاقے میں سیکورٹی خدشات بڑھا دیے ہیں، جس کے بعد سیکورٹی فورسز نے وسیع پیمانے پر تلاشی آپریشن شروع کر دیا۔
ذرائع کے مطابق بی ایس ایف اہلکاروں نے ڈرون کی حرکت کو شام تقریباً سات بجے محسوس کیا، جس کے بعد اس کی سمت اور بلندی کا پتہ لگانے کے لئے گراؤنڈ یونٹس کو فوری طور پر متحرک کیا گیا۔
سیکورٹی حکام کا کہنا ہے کہ حالیہ ہفتوں میں سانبہ اور پونچھ بیلٹ میں ڈرون سرگرمیوں میں اضافہ دیکھا گیا ہے، جن کا مقصد ہتھیاروں کی اسمگلنگ، منشیات کی ترسیل یا فضائی نگرانی ہوسکتا ہے۔
اطلاعات کے مطابق واقعے کے فوراً بعد بی ایس ایف، مقامی پولیس اور خصوصی کمانڈوز نے مشترکہ تلاشی کارروائی شروع کی، جس میں سرحدی دیہات، کھیتوں، نالوں اور گنجان جھاڑیوں کا باریک بینی سے معائنہ کیا جا رہا ہے۔
ذرائع نے بتایا کہ ابھی تک کوئی مشکوک سامان برآمد نہیں ہوا، تاہم پوری بیلٹ کو محفوظ بنانے کے لئے سرچ آپریشن جاری رہے گا۔ انہوں نے مزید کہا کہ فورسز جدید اینٹی ڈرون سسٹمز کی مدد بھی لے رہی ہیں تاکہ کسی ممکنہ خطرے کو فوری طور پر ناکام بنایا جاسکے۔
حکام نے مقامی لوگوں سے اپیل کی ہے کہ کسی بھی غیر معمولی سرگرمی یا مشاہدے کی فوری اطلاع نزدیک ترین پولیس یا بی ایس ایف کیمپ کو دیں تاکہ کارروائی میں مزید سرعت لائی جاسکے۔
ذرائع کا کہنا ہے کہ واقعہ جموں بیلٹ میں جاری ڈرون چیلنجز کی ایک اور کڑی ہے، جن سے نمٹنے کے لئے فورسز نے گزشتہ چند مہینوں میں گشت، نگرانی اور تکنیکی وسائل میں اضافہ کیا ہے۔ سانبہ سمیت پوری بین الاقوامی سرحد پر چوکسی مزید سخت کر دی گئی ہے تاکہ کسی بھی دراندازی یا تخریب کاری کے منصوبے کو بروقت ناکام بنایا جا سکے۔
0
