جموں، 2 نومبر (یو این آئی) منشیات کے خلاف کریک ڈائون کو جاری رکھتے ہوئے جموں و کشمیر پولیس نے ضلع پونچھ میں ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں کہا کہ ایک مصدقہ اطلاع پر کارروائی کرتے ہوئے سرنکوٹ پولیس کی ایک ٹیم نے مرزا موڑ پر پٹرول پمپ کے نزدیک خصوصی ناکہ لگا دیا۔
انہوں نے کہا کہ چیکنگ کے دوران ایک راہ گیر کو روکا گیا اور تلاشی کے دوران اس کی تحویل سے 7 گرام ہیروئن جیسا ممنوعہ مواد بر آمد کیا گیا۔
ملزم کی شناخت نثار احمد ولد لال حسین ساکن پوتھہ کے طور پر کی گئی ہے۔
پولیس ترجمان نے بتایا کہ اس ضمن میں پولیس اسٹیشن سرنکوٹ میں این ڈی پپی ایس ایکٹ کے متعلقہ دفعات کے تحت زیر ایف آئی آر نمبر 262/2025 ایک مقدمہ درج کیا گیا اور مزید تحقیقات شروع کی گئیں۔
انہوں نے کہا کہ پونچھ پولیس منشیات کے خلاف مہم کو وسیع پیمانے پر جاری رکھنے کے لئے پر عزم ہے۔
