کشمیر میں برف و باراں کی پیش گوئی کے بیچ سردیوں کا زور تیز تر

سری نگر، 27 دسمبر (یو این آئی) محکمہ موسمیات کی طرف سے برف و باراں کے ایک اور مرحلے کی پیش گوئی کے درمیان وادی کشمیر میں شبانہ سردیوں کو زور تیز تر ہوا ہے۔
محکمے کے ایک ترجمان کے مطابق وادی میں 27 سے 29 دسمبر تک موسم جزوی ابر آلود مگر خشک رہنے کا امکان ہے۔
انہوں نے کہا کہ 30 دسمبر کو موسم مجموعی طور پر ابر آلود رہنے کے ساتھ کہیں کہیں ہلکی برف باری یا بارشیں ہوسکتی ہیں۔
ان کا کہنا ہے کہ بعد میں 31 دسمبر سے یکم جنوری تک موسم مجموعی طور پر ابر آمود رہنے کے ساتھ کئی مقامات پر ہلکی برف باری یا بارشوں کا امکان ہے جبکہ اس دوران شمالی اور وسطی کشمیر کے پہاڑی علاقوں میں درمیانی درجے کی برف باری ہوسکتی ہے۔
ترجمان نے بتایا کہ 2 جنوری کو موسم جزوی سے مجموعی طور پر ابر آلود رہ سکتا ہے اور اس دوران کہیں کہیں ہلکے درجے کا برف و باراں متوقع ہے۔
انہوں نے کہا کہ وادی میں 3 سے 7 جنوری تک موسم جزوی ابر آلود جبکہ 8 اور 9 جنوری کو موسم جزوی سے مجموعی طور پر ابر آلود رہنے کا امکان ہے۔
محکمے نے اپنی ایڈوائزری میں مسافروں اور ٹرانسپورٹروں سے کہا ہے کہ وہ ٹریفک اور انتظامیہ کی ایڈوائزرز پر سختی سے عمل کریں۔
انہوں نے کہا کہ جموں صوبے کے کچھ حصوں میں اگلے دو دنوں کے دوران درمیانی سے گہری دھند چھائی رہ سکتی ہے۔
دریں اثنا وادی میں شبانہ درجہ حرارت نقطہ انجماد سے نیچے ریکارڈ ہونے سے سردیوں کا زور تیز تر ہوا ہے۔
گرمائی دارلحکومت سری نگر میں کم سے کم درجہ حرارت منفی2.6 ڈگری سینٹی گریڈ ریکارڈ ہوا ہے جہاں 28 نومبر کو رواں موسم کی سرد ترین رات ریکارڈ ہوئی تھی جب شبانہ درجہ حرارت منفی4.5 ڈگری سینٹی گریڈ ریکارڈ ہوا تھا۔
وادی کے مشہور سیاحتی مقامات گلمرگ اور پہلگام میں کم سے کم درجہ حرارت بالترتیب منفی4.2 ڈگری سینٹی گریڈ اور منفی4.8 ڈگری سینٹی گریڈ ریکارڈ ہوا ہے۔
وادی کے ایک اور مشہور سیاحتی مقام سونہ مرگ میں کم سے کم درجہ حرارت منفی5.8 ڈگری سینٹی گریڈ ریکارڈ ہوا ہے۔
سرحدی ضلع کپوارہ میں کم سے کم درجہ حرارت منفی3.8 ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی2.8 ڈگری سینٹی گریڈ ریکارڈ ہوا ہے۔
جنوبی کشمیر کے اننت ناگ، پلوامہ، شوپیاں اور کولگام میں کم سے کم درجہ حرارت بالترتیب منفی3.6 ڈگری سینٹی گریڈ، منفی4.3 ڈگری سینٹی گریڈ، منفی4.7 اور منفی1.9 ڈگری سینٹی گریڈ ریکارڈ ہوا ہے۔
شمالی کشمیر کے بارہمولہ اور بانڈی پورہ اضلاع میں کم سے کم درجہ حرارت بالترتیب منفی 2.5 ڈگری سینٹی گریڈ اور منفی2.0 ڈگری سینٹی گریڈ ریکارڈ ہوا ہے۔
وسطی کشمیر کے بڈگام اور گاندربل اضلاع میں کم سے کم درجہ حرارت بالترتیب منفی2.7 ڈگری سینٹی گریڈ اور منفی1.8 ڈگری سینٹی گریڈ ریکارڈ ہوا ہے۔
لداخ یونین ٹریٹری کے لیہہ اور کرگل اضلاع میں شبانہ درجہ حرارت بالترتیب منفی9.9 ڈگری سینٹی گریڈ اور منفی9.2 ڈگری سینٹی گریڈ ریکارڈ ہوا ہے جبکہ قصبہ دراس میں کم سے کم درجہ حرارت منفی18.1 ڈگری سینٹی گریڈ ریکارڈ ہوا ہے۔