سری نگر، 16 دسمبر (یو این آئی) محمکہ موسمیات کی پیش گوئی کے مطابق 21 دسمبر سے شروع ہونے والا سخت ترین سردیوں کے لئے مشہور 40 روزہ چلہ کلاں اپنی آمد کا اعلان وادی کشمیر کے پہاڑی علاقوں میں ہلکی برف باری اور میدانی علاقوں میں ہلکی بارشوں سے کر سکتا ہے۔
متعلقہ محکمے کے ایک ترجمان نے بتایا کہ وادی میں 16 اور 17 دسمبر کو مطلع جزوی طور پر ابر آلود رہنے کا امکان ہے۔
انہوں نے کہا کہ بعد میں 18 اور 19 دسمبر کو مطلع جزوی سے مجموعی طور پر ابر آلود رہنے کے ساتھ شمالی اور وسطی کشمیر کے پہاڑی علاقوں میں کہیں کہیں ہلکی برف باری متوقع ہے۔
ان کا کہنا ہے کہ 20دسمبر کی شام سے 21 دسمبر کی دو پہر تک وادی کے پہاڑی علاقوں میں ہلکی برف باری جبکہ میدانی علاقوں میں ہلکی بارشوں کا امکان ہے۔
موصوف ترجمان نے بتایا کہ 22 سے 28 دسمبر تک وادی میں موسم جزوی سے مجموعی طور پر ابر آلود مگر خشک رہنے کی توقع ہے۔
انہوں نے کہ 29 سے 31 دسمبر تک شمالی اور وسطی کشمیر کے پہاڑی علاقوں میں کہیں کہیں ہلکی برف باری ہوسکتی ہے۔
محکمے نے اپنی ایڈوائزری میں کہا ہے کہ اس دوران وادی کے کئی علاقوں اور جموں صوبے کے کچھ علاقوں میں ہلکی سے درمیانی درجے کی دھند چھائی رہ سکتی ہے۔
انہوں نے کہا کہ 20 دسمبر کی شام سے 21 دسمبر کی دوپہر تک ہلکی برف باری اور درجہ حرارت نقطہ انجماد سے نیچے درج ہونے کے نتیجے میں پہاڑی علاقوں میں سڑکوں پر پھسلن پیدا ہوسکتی ہے جس کے پیش نظر ٹرانسپورٹروں اور مسافروں سے کہا گیا ہے کہ وہ ٹریفک ایڈوائزری پر عمل کریں۔
دریں اثنا وادی میں شبانہ درجہ حرارت میں ایک بار پھر گراوٹ درج ہوئی جس سے سردیوں کا زور بڑھ گیا ہے۔
کشمیر ویدر کے مطابق گرمائی دارلحکومت سری نگر میں کم سے کم درجہ حرارت منفی1.8 ڈگری سینٹی گریڈ ریکارڈ ہوا ہے جہاں گذشتہ شب کا درجہ حرارت 1.9 ڈگری سینٹی گریڈ درج کیا گیا تھا۔
وادی کے مشہور سیاحتی مقامات پہلگام اور گلمرگ میں کم سے کم درجہ حرارت بالترتیب منفی2.6 ڈگری سینٹی گریڈ اور 0.5 ڈگری سینٹی گریڈ ریکارڈ ہوا ہے۔
سرحدی ضلع کپوارہ میں کم سے کم درجہ حرارت منفی1.8 ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی2.2 ڈگری سینٹی گریڈ ریکارڈ ہوا ہے۔
وسطی کشمیر کے بڈگام اور گاندربل اضلاع میں کم سے کم درجہ حرارت بالترتیب منفی2.8 ڈگری سینٹی گریڈ اور منفی1.2 ڈگری سینٹی گریڈ ریکارڈ ہوا ہے۔
شمالی کشمیر کے بارہمولہ اور بانڈی پورہ اضلاع میں شبانہ درجہ حرارت بالترتیب منفی 2.9ڈگری سینٹی گریڈ اور منفی2.2 ڈگری سینٹی گریڈ ریکارڈ ہوا ہے۔
جنوبی کشمیر کے اننت ناگ، پلوامہ، شوپیاں اور کولگام اضلاع میں کم سے کم درجہ حرارت بالتریب منفی3.3 ڈگری سینٹی گریڈ، منفی4.0 ڈگری سینٹی گریڈ، منفی3.8 ڈگری سینٹی گریڈ اور منفی0.5 ڈگری سینٹی گریڈ ریکارڈ ہوا ہے۔
وادی کے ایک اور مشہور سیاحتی مقام سونہ مرگ میں کم سے کم درجہ حرارت منفی1.3 ڈگری سینٹی گریڈ جبکہ زوجیلا پاس پر شبانہ درجہ حرارت منفی17.0 ڈگری سینٹی گریڈ ریکارڈ ہوا ہے۔
لداخ یونین ٹریٹری کے لیہہ اور کرگل اضلاع میں کم سے کم درجہ حرارت بالترتیب منفی4.8 ڈگری سینٹی گریڈ اور منفی4.2 ڈگری سینٹی گریڈ جبکہ قصبہ دارس میں شبانہ درجہ حرارت منفی8.2 ڈگری سینٹی گریڈ ریکارڈ ہوا ہے۔
0
