جموں، یکم اکتوبر (یو این آئی) منشیات کے خلاف مسلسل کوششوں کو جاری رکھتے ہوئے پولیس نے ضلع کٹھوعہ میں ایک منشیات فروش کو گرفتار کرکے اس کی تحویل سے ہیروئن جیسا مواد بر آمد کیا ہے۔
ایک پولیس ترجمان نے اپنے ایک بیان میں کہا کہ پولیس پوسٹ انڈسٹریل اسٹیٹ کٹھوعہ کی ایک ٹیم نے ایک مصدقہ اطلاع پر کارروائی کرتے ہوئے برمورا علاقے میں ایک خصوصی ناکے اور چیکنگ کے دوران ایک شخص کو دھر لیا۔
انہوں نے کہا کہ تلاشی کے دوران اس کی تحویل سے تقریباً 6 گرام ہیروئن جیسا ممنوعہ مواد بر آمد کیا جس کے بعد اس کی بر سر موقع ہی گرفتاری عمل میں لائی گئی۔
ملزم کی شناخت محمد انجم ولد بن یامن ساکن جگت پور کٹھوعہ کے طور پر کی گئی ہے۔
پولیس ترجمان نے بتایا کہ اس ضمن میں پولیس اسٹیشن کٹھوعہ میں این ڈی پی ایس ایکٹ کے تحت زیر ایف آئی آر نمبر 474/2025 ایک مقدمہ درج کیا گیا اور مزید تحقیقات شروع کی گئیں۔
انہوں نے عوام سے اپیل کی کہ وہ منشیات سے متعلق کسی بھی سرگرمی کی اطلاع پولیس کو دیں۔
0
