سری نگر :۶۲،ستمبر : مرکزی زیرانتظام علاقے لداخ کی راجدھانی لیہہ شہر میں بغیرکسی نرمی کے جمعہ کو مسلسل تیسرے دن کرفیو نافذجاری اورکارگل، نوبرا، زنسکار، پدم، چانگ تھانگ، دراس اور لامایورو میں پابندیاں برقرار رہنے کے بیچ وزارت داخلہ کی ایک ٹیم نے سیکورٹی کی مجموعی صورتحال کا جائزہ لینے کےلئے یہاں کئی میٹنگیں کیں۔حکام نے بتایا کہ کہیں سے بھی کسی ناخوشگوار واقعے کی اطلاع نہیں ملی۔بدھ کی شام کولیہہ قصبے میں کرفیو نافذ کر دیا گیا تھا ،جب LABکی کال پر’ ریاستی درجہ دینے اور چھٹے شیڈول کی لداخ میں توسیع کے مطالبے‘کولیکر ہوئے احتجاج کے دوران وسیع پیمانے پر تشدد کے نتیجے میں4 افراد کی موت اور کئی سیکورٹی اہلکاروں سمیت90 دیگر زخمی ہو گئے تھے۔جے کے این ایس کے مطابق حکام نے جمعہ کوبتایا کہ لداخ میں سیکورٹی کی مجموعی صورتحال پرامن رہی۔ لوگوں کو ضروری اشیاءخریدنے کی اجازت دینے کیلئے دن کے آخر میں پابندیوں میں نرمی کا امکان ہے۔وسیع پیمانے پر ہونے والی جھڑپوں کے بعد 50 سے زیادہ افراد کو حراست میں لیا گیا تھا، جب کہ کرگل سمیت دیگر7 بڑے قصبوں میں بی این ایس کی دفعہ163کے تحت5 یا اس سے زیادہ افراد کے جمع ہونے پر پابندی کے احکامات کے تحت سخت پابندیاں بھی نافذ رہیں۔پولیس اور نیم فوجی دستے انسدادفسادات کی وردیوں میں امن و امان برقرار رکھنے کے لئے سنسان گلیوں میں گشت کرتے نظر آئے۔بہت سے علاقوں میں لوگوں نے شکایت کی کہ ان کے پاس راشن، دودھ اور سبزیوں سمیت ضروری سامان کی کمی ہے۔لیہہ کے ضلع مجسٹریٹ رومیل سنگھ ڈونک نے تمام سرکاری اور نجی اسکولوں، کالجوں اور دیگر تعلیمی اداروں کو جمعہ سے2دن کےلئے بند رکھنے کا حکم دیا ہے۔ ضلع مجسٹریٹ نے کہا کہ اس کے علاوہ آنگن واڑی مراکز بھی بند رہیں گے۔عہدیداروں نے بتایا کہ وزارت داخلہ کے عہدیداروں کی ایک اعلیٰ سطحی ٹیم سیکورٹی صورتحال کا جائزہ لینے کےلئے جمعرات کو لیہہ پہنچی۔انہوں نے لیفٹیننٹ گورنر اور سول اور پولیس افسران کے علاوہ ایل اے بی کے نمائندوں کےساتھ سلسلہ وار ملاقاتیں کیں۔میٹنگ میں فیصلہ کیا گیا کہ وزارت داخلہ کےساتھ ایک تیاری میٹنگ27 یا 28 ستمبر کو نئی دہلی میں ہوگی، جو کہ مرکزی وزارت داخلہ کی طرف سے تاریخ کی تصدیق سے مشروط ہے۔ میٹنگ میں لیہہ ایپیکس باڈیLAB اور کارگل ڈیموکریٹک الائنسKDA کے تین تین نمائندوں کے علاوہ لداخ کے ایم پی (محمد حنیفہ جان) بھی شرکت کریں گے۔ لیہہ ایپیکس باڈیLAB کے چیئرمین تھوپستان چھیوانگ اور شریک چیئرمین چیرنگ دورجے کی طرف سے جاری کردہ مشترکہ بیان میں کہا گیا ہے کہ تیاری اجلاس کے بعد وزارت داخلہ کی ایک اعلیٰ اختیاراتی کمیٹی کےساتھ ایک فوری سرکاری میٹنگ ہو گی جس میں LAB اور KDA کے7 اراکین4 نکاتی ایجنڈے پر مذاکرات ہوں گے۔ایل اے بی اور کے ڈی اے اپنے مطالبات’ لداخ کوریاست کا درجہ، آئین کے چھٹے شیڈول میں توسیع، لیہہ اور کارگل کے لیے الگ لوک سبھا کی نشستوں اور پبلک سروس کمیشن کی حمایت میں گزشتہ4 سالوں سے مشترکہ طور پر ایک ایجی ٹیشن کی قیادت کر رہے ہیں۔انہوں نے ماضی میں حکومت کے ساتھ بات چیت کے کئی دورکئے ہیں، ملازمتوں کی ضمانتوں اور لوک سبھا کی اضافی نشست کے بارے میں ایک معاہدے پر پہنچ چکے ہیں جس کا فیصلہ حد بندی کمیشن کرے گا، جس سے ریاست کا درجہ اور چھٹے شیڈول کے مطالبے پر توجہ دی جائے گی۔ مرکز کے ساتھ بات چیت کا اگلا دور 6 اکتوبر کو طے ہے۔
0
