کل جماعتی میٹنگ میں شامل نہیں ہوں گے اپوزیشن کے لیڈر راہل گاندھی

نئی دہلی، 24 مارچ (یواین آئی) ایران میں جاری جنگ کے باعث ملک میں پیدا ہونے والے ایندھن اور انسانی بحران کے درمیان مرکزی حکومت نے کل جماعتی میٹنگ بلانے کا فیصلہ کیا ہے۔
مرکزی حکومت نے بدھ کی شام 5 بجے کل جماعتی میٹنگ منعقد کی ہے، جس میں مختلف سیاسی جماعتوں کی شرکت یقینی بنانے کے لیے ان سے رابطہ کیا جا رہا ہے۔ ذرائع کے مطابق اس میٹنگ میں خواتین کو 33 فیصد ریزرویشن دینے والے بل پر بھی بحث ممکن ہے اور حکومت اس معاملے پر تمام جماعتوں کا تعاون چاہتی ہے۔
حکومت کی جانب سے بلائی گئے کل جماعتی میٹنگ پر ردعمل دیتے ہوئے لوک سبھا میں اپوزیشن لیڈر راہل گاندھی نے منگل کو کہا کہ وہ پہلے سے طے شدہ کیرالہ کے دورے کی وجہ سے میٹنگ میں شریک نہیں ہو سکیں گے۔ انہوں نے کہا کہ اس مسئلے پر بحث ضروری ہے، لیکن حکومت پہلے ہی سنگین غلطی کر چکی ہے۔
مسٹر راہل گاندھی نے الزام لگایا کہ نظام کا ڈھانچہ ہی کمزور کر دیا گیا ہے، جسے بہتر کرنے میں کافی وقت لگے گا۔ انہوں نے یہ بھی کہا کہ وزیراعظم نریندر مودی آزادانہ فیصلے کرنے کے بجائے امریکہ اور اسرائیل کے اثر و رسوخ میں کام کرتے ہیں اور کسانوں و نوجوانوں کے مفاد میں موثر اقدامات نہیں کر پا رہے ہیں۔