سری نگر :۳،دسمبر : ایک سال کی محنت اور گفت و شنید کے کئی ا دوار کے بعد، وزیر اعلیٰ عمر عبداللہ کی قیادت میں جموں و کشمیر کی کابینہ نے بدھ کے روزریزرویشن کے معاملے پر حتمی فیصلہ لیا اور فائل کو منظوری کےلئے لیفٹیننٹ گورنر منوج سنہا کو بھیج دیا ہے۔کابینہ کے ایجنڈے میں 22معاملات تھے، اور ریزرویشن کا مسئلہ ان میں سے ایک تھا۔جے کے این ایس کے مطابق حکام نے بتایا کہ وزیر اعلیٰ عمر عبداللہ کی صدارت میں جموں و کشمیر کابینہ نے بدھ کی صبح یہاں میٹنگ کی اور محکمہ روڈز اینڈ بلڈنگز (آر اینڈ بی) ڈیپارٹمنٹ میں ترقیوں اور جانوروں کے تحفظ کے بورڈ کے قیام سمیت کئی محکمانہ تجاویز کو منظوری دی۔صبح9بجے وزیر اعلیٰ جموں کی رہائش گاہ پر منعقدہ میٹنگ میں گورننس اور ترقی سے جڑے متعدد انتظامی امور پر تبادلہ خیال کیا گیا۔انہوں نے مزید کہا کہ بات چیت کے دوران بجلی، ریزرویشن اور موسم سرما کی تیاری سے متعلق مسائل بھی سامنے آئے۔کابینہ میٹنگ میںمحکمہ آر اینڈ بی میں افسر کیڈرز کی ترقی اور خدمات سے متعلق ایک تجویز کو تفصیلی بحث کے بعد منظوری دی گئی، جبکہ لائیو سٹاک اور فشریز کے شعبوں میں کام کرنے والی کوآپریٹو سوسائٹیوں کو مضبوط بنانے کے لیے مالی امداد کی منظوری دی گئی۔کابینہ کے وزیر جاوید رانا نے اجلاس کے بعد صحافیوں کو بتایا کہ کئی ایجنڈاآئٹموں کو کلیئر کر دیا گیا جس میں زیر التواءانتظامی معاملات کے بروقت ازالہ پر توجہ دی گئی۔جاویدرانا نے کہاکہ کچھ معمولی مسائل تھے جن پر تبادلہ خیال کیا گیا لیکن میں کہوں گا کہ مرکزی ایجنڈے میں محکمہ آر اینڈ بی کے افسران کی ترقی اور تجویز شامل تھی۔ اب ان کی سنیارٹی کی تصدیق پر اتفاق ہو گیا ہے ۔انہوںنے مزیدکہاکہ اسی طرح، ہمارے پیادے اور اینگلرز کمیونٹی ، میں نے ان کے لیے ایک سفارش کی تھی۔انہوں نے کہا کہ کابینہ نے مویشیوں سے متعلق ضوابط اور فلاحی طریقہ کار کو ہموار کرنے کے لیے اینیمل پروٹیکشن بورڈ کے قیام کی بھی منظوری دی۔وزیر جاوید رانا نے نوٹ کیا کہ تمام سرکاری محکموں میں یومیہ اجرت پرکام کرنے والوںکے معاملے پر بھی تبادلہ خیال کیا گیا۔انہوں نے کہاکہ چیف سیکرٹری کو جلد از جلد رپورٹ پیش کرنے کی ہدایت کی گئی ہے کیونکہ مختلف زمروں کے یومیہ اجرت سے متعلق ایک بڑا مسئلہ ہے۔ وزیر جاوید رانانے ساتھ ہی کہاکہ ان کے تئیں حکومت کی ذمہ داری ہے اور ہم چاہتے ہیں کہ انصاف کیا جائے۔ذرائع نے بتایا کہ اجلاس زیر التواءمحکمانہ رپورٹس کو جلد جمع کرانے اور آج کے تمام فیصلوں پر بلا تاخیر عمل درآمد کو یقینی بنانے کی ہدایات کے ساتھ اختتام پذیر ہوا۔اس دوران معلوم ہواکہ کابینہ نے ریزرویشن سے متعلق کابینہ کی ذیلی کمیٹی کی تجویز پر حتمی فیصلہ لیا اور فائل کومنظوری کیلئے لیفٹیننٹ گورنر منوج سنہا کو بھیج دیا ہے۔کابینہ میٹنگ کے بعد وزیر اعلیٰ عمر عبداللہ نے ریزرویشن سے متعلق ذیلی کمیٹی کی رپورٹ پر کابینہ کی بحث پر تبصرہ کرنے سے انکار کرتے ہوئے کہا کہ اس وقت تک بات کرنا مناسب نہیں ہوگا جب تک کہ سرکاری رسمی کارروائیاں مکمل نہیں ہو جاتیں اور فائل لیفٹیننٹ گورنر کو بھیجی جاتی ہے۔وزیر اعلیٰ نے کہا کہ کابینہ کے اجلاس کے منٹس کو حتمی شکل دینا اور آگے بڑھانا باقی ہے اور اس سے پہلے کوئی بھی عوامی بیان قبل از وقت ہوگا۔انہوںنے کہاکہ کابینہ کے اجلاس کے منٹس کو تحریر، دستخط اور ایل جی کو بھیجنا ہوگا۔ وزیر اعلیٰ عمر عبداللہ نے کہاکہ جب تک یہ نہیں ہو جاتا، جو فیصلہ کیا گیا ہے اس پر تبصرہ کرنا درست نہیں ہوگا ۔انہوں نے کہا کہ کابینہ نے ریزرویشن فریم ورک کو منصفانہ انداز میں معقول بنانے کی کوشش کرتے ہوئے لوگوں کی توقعات پر پورا اترنے کی سنجیدہ کوششیں کی ہیں۔
اسبات کو یقینی بنانے کی ہر ممکن کوشش کی کہ تبدیلیاں منصفانہ ہوں اور کسی بھی طبقے کےساتھ ناانصافی نہ ہو
0
