کرائم برانچ کی بڑی کارروائی: رشتہ بھی جھوٹا، وعدہ بھی جھوٹا؛ نوکری کے نام پر لوٹنے والے دو ملزمان کے خلاف چارج شیٹ دائر

سرینگر:18 دسمبر (عقاب نیوز)کرائم برانچ کشمیر کے اکنامک آفنسز ونگ (EOW) نے جمعرات کو ایک اہم کارروائی کرتے ہوئے سرکاری نوکری دلانے کے نام پر لاکھوں روپے ہڑپنے والے دو ملزمان کے خلاف عدالت میں چالان (چارج شیٹ) پیش کر دیا ہے۔ ملزمان کے خلاف ایف آئی آر نمبر 08/2024 کے تحت دفعہ 420 (دھوکہ دہی) اور 120-B (مجرمانہ سازش) کے تحت مقدمہ درج کیا گیا تھا۔ کرائم برانچ کی جانب سے جاری کردہ تفصیلات کے مطابق، یہ چارج شیٹ چیف جوڈیشل مجسٹریٹ بڈگام کی معزز عدالت میں جمع کرائی گئی ہے تاکہ ملزمان کے خلاف قانونی کارروائی آگے بڑھائی جا سکے۔
اس کیس کی بنیاد ایک تحریری شکایت پر تھی جس میں الزام لگایا گیا تھا کہ ضلع کپواڑہ کے زرہامہ کی رہائشی عشرت بانو نامی خاتون نے شکایت کنندہ کو یہ کہہ کر ورغلایا کہ اس کا شوہر اسے سرکاری نوکری دلوا سکتا ہے۔ اس جھوٹے وعدے کے جال میں پھنس کر شکایت کنندہ نے 11 لاکھ روپے کی خطیر رقم بینک اکاؤنٹ میں منتقل کر دی۔ تاہم، طویل عرصے تک نہ تو نوکری ملی اور نہ ہی بار بار تقاضے کے باوجود رقم واپس کی گئی۔
جب اکنامک آفنسز ونگ نے معاملے کی گہرائی سے تحقیقات کیں تو ایک حیران کن انکشاف سامنے آیا۔ تحقیقات میں پتہ چلا کہ شکایت کنندہ نے جو رقم منتقل کی تھی وہ کپواڑہ کے ہی رہائشی گلزار احمد وانی عرف شاہد کے اکاؤنٹ میں گئی تھی۔ مزید چھان بین پر یہ بھانڈا بھی پھوٹ گیا کہ ملزم گلزار احمد اور ملزمہ عشرت بانو کے درمیان میاں بیوی کا کوئی رشتہ ہی نہیں تھا، جیسا کہ دعویٰ کیا گیا تھا۔ یہ محض ایک سوچی سمجھی سازش تھی جس کا مقصد صرف پیسے لوٹنا تھا۔ تحقیقات مکمل ہونے پر دونوں ملزمان کا جرم ثابت پایا گیا، جس کے بعد اب معاملہ عدالت کے سپرد کر دیا گیا ہے۔