نئی دلی۔ 3؍جون۔ ایم این این۔ بھارت کے الیکشن کمیشن نے پیر کو کہا کہ وہ جموں و کشمیر میں اسمبلی انتخابات کرانے کے لیے تیار ہے اور مرکزی زیر انتظام علاقے میں گزشتہ چار دہائیوں میں 2024 کے لوک سبھا انتخابات میں سب سے زیادہ ووٹ ڈالے گئے ہیں۔ ذرائع ابلاغ کے مطابق1 جون کو ختم ہونے والے میراتھن 7 فیزکے 2024 کے عام انتخابات کا جائزہ دینے کے لیے نئی دہلی میں ایک پریس کانفرنس سے خطاب کرتے ہوئے چیف الیکشن کمشنر راجیو کمار نے کہا کہ کمیشن جموں و کشمیر میں اسمبلی انتخابات کرانے کے لیے تیار ہے۔انہوں نے کہا کہ جموں و کشمیر میں گزشتہ چار دہائیوں میں 2024 کے لوک سبھا انتخابات میں 58.58 فیصد کے ساتھ سب سے زیادہ ووٹ ڈالے گئے، جب کہ وادی کشمیر میں 51.05 فیصد ووٹ ڈالے گئے۔انہوں نے یہ بھی کہا کہ جموں و کشمیر سمیت ملک میں کہیں بھی انتخابات کے دوران کوئی بڑا واقعہ رپورٹ نہیں ہوا۔7 مرحلوں پر مشتمل لوک سبھا انتخابات 01 جون کو اختتام پذیر ہوئے، جبکہ ووٹوں کی گنتی کل ہوگی۔ 01 جون کو، ایگزٹ پولز نے پی ایم مودی کی قیادت والی این ڈی اے کے لیے زبردست جیت کی پیش گوئی کی ہے اور اس اتحاد کو 350 سے زیادہ سیٹیں حاصل کرنے کے لیے تیار ہے۔دریں اثنا، جموں و کشمیر سمیت ملک بھر میں ووٹوں کی گنتی کے لیے سخت حفاظتی اقدامات کے ساتھ تمام انتظامات کیے گئے ہیں۔جموں و کشمیر کے لیے، زیادہ تر ایگزٹ پولز نے نیشنل کانفرنس کو وادی کشمیر کی تینوں لوک سبھا سیٹوں، جموں ڈویژن میں بی جے پی کو دو اور لداخ میں لوک سبھا کی واحد سیٹ جیتنے کی پیش گوئی کی ہے۔
0
