الامارات (عمان)، 13 اپریل (یو این آئی) نیپال کے آل راؤنڈر دیپندر سنگھ ایری ٹی-20 میں ایک اوور میں چھ چھکے لگانے والے تیسرے بلے باز بن گئے ہیں۔
24 سالہ نیپال کے آل راؤنڈر نے ہفتہ کو قطر کے خلاف اے سی سی مینز ٹی۔20 پریمیئر کپ میچ میں ایک اوور میں چھ چھکے لگائے۔ یوراج سنگھ اور کیرون پولارڈ کے بعد ایری ٹی ٹوئنٹی میں یہ کارنامہ انجام دینے والے تیسرے بلے باز بن گئے ہیں۔
یوراج پہلے کھلاڑی تھے جنہوں نے آئی سی سی مینز ٹی۔ٹوئنٹی ورلڈ کپ 2007 میں اسٹورٹ براڈ کی گیند پر ایسا کیا۔ پولارڈ نے 2021 میں کولج میں چھ چھکے لگا کر اکیلا دھنجے کا ریکارڈ برابر کیا تھا۔
ون ڈے میں ہرشل گبز 2007 کے آئی سی سی مینز کرکٹ ورلڈ کپ ہالینڈ کے خلاف میچ کے دوران ایک اوور میں چھ چھکے لگانے والے پہلے کھلاڑی تھے۔ آئی سی سی کی ایک رپورٹ میں کہا گیا ہے کہ امریکہ کے جسکرن ملہوترا نے 2021 میں پاپوا نیو گنی کے خلاف یہی کارنامہ انجام دیا تھا۔
کامران خان کے خلاف اننگز کے آخری اوور کے آغاز سے قبل ایری 15 گیندوں پر 28 رنز بنا کر کھیل رہے تھے۔ انہوں نے آخری اوور کی ہر گیند پر چھکا لگا کر 21 گیندوں میں 64 رنز بنائے۔
نیپال کے اسٹار کھلاڑی نے 2016 میں آئی سی سی مینز انڈر 19 کرکٹ ورلڈ کپ میں حصہ لیا تھا اور 17 سال کی عمر میں سینئر ٹیم میں شامل ہوئے۔ دلچسپ بات یہ ہے کہ ایری نے گزشتہ سال ایشین گیمز میں منگولیا کے خلاف لگاتار چھ چھکے لگائے تھے لیکن پھر یہ کارنامہ دو اوورز تک پھیل گیا کیونکہ انہوں نے ٹی ٹوئنٹی میں نو گیندوں پر تیز ترین نصف سنچری بنا کر یوراج سنگھ کا 12 گیندوں کا ریکارڈ توڑ دیا تھا۔
آئی سی سی مینز ٹی 20 ورلڈ کپ 2024 میں 50 سے بھی کم دن باقی ہیں اور ایری کی فارم نیپال کے لیے ایک بہت بڑی کامیابی ہے۔ کیریبین جزائر میں ہونے والے اس ٹورنامنٹ میں نیپال گروپ ڈی میں جنوبی افریقہ، سری لنکا، بنگلہ دیش، امریکہ اور ہالینڈ کے ساتھ ہے۔
0
