نئی دہلی، 17 فروری (یو این آئی )کرکٹ کی دنیا کے 14 عظیم سابق کپتانوں نے، جن میں سنیل گواسکر، کپل دیو اور گریگ چیپل شامل ہیں، حکومتِ پاکستان سے پرزور اپیل کی ہے کہ عمران خان کے ساتھ جسمانی، ذہنی، سماجی اور ماحولیاتی اعتبار سے بہتر رویہ اختیار کرے۔
یہ مشترکہ بیان منتخب میڈیا آؤٹ لیٹس کو جاری کیا گیا، جس میں سابق ورلڈ کپ فاتح کپتان کی فلاح و بہبود کے لیے باقاعدہ درخواست کی گئی ہے۔
ایک مشترکہ بیان میں ان عالمی لیجنڈز نے جیل میں قید سابق ورلڈ کپ فاتح کپتان کی صحت اور حفاظت کے حوالے سے اپنی شدید تشویش کا اظہار کیا ہے۔ان کا کہنا ہے کہ عمران خان کو ان کی پسند کے ماہر ڈاکٹروں تک فوری اور مستقل رسائی دی جائے۔
عالمی معیار کے مطابق انسانی اور باوقار حالات میں رکھا جائے اور اہل خانہ کو باقاعدگی سے ملنے کی اجازت ہو۔قانونی عمل تک شفاف اور بلا تاخیر رسائی فراہم کی جائے۔حراست کے دوران ان کی آنکھوں کی روشنی میں خطرناک کمی اور پچھلے دو سالوں میں جیل کے حالات شدید تشویش کا باعث ہیں۔
سابق کپتانوں نے کہا کہ عمران خان جیسے عالمی سطح کے کھیل اور سیاسی رہنما کے ساتھ عزت اور بنیادی انسانی حقوق کے مطابق سلوک ہونا چاہیے۔
مشترکہ بیان میں کہا گیا ہے کہ عمران خان جیسے قد آور شخص، جو نہ صرف ایک قومی لیڈر رہے بلکہ کرکٹ کی تاریخ کے بہترین آل راؤنڈرز میں سے ایک ہیں، کے ساتھ ویسا ہی برتاؤ ہونا چاہیے جس کے وہ حقدار ہیں۔ کرکٹرز نے عمران خان کی 1992 کے ورلڈ کپ میں تاریخی قیادت کا ذکر کرتے ہوئے کہا کہ ان کی شخصیت نے سرحدوں سے بالاتر ہو کر نسلوں کو متاثر کیا ہے۔
بیان پر دستخط کرنے والوں میں مائیکل اتھرٹن، ایلن بارڈر، ڈیوڈ گاور، اسٹیو وا، کلائیو لائیڈ اور ناصر حسین جیسے بڑے نام شامل ہیں۔ ان کا کہنا ہے کہ “ہماری یہ اپیل کسی سیاسی مداخلت کے لیے نہیں بلکہ محض انسانیت اور کھیل کے جذبے کے تحت ہے تاکہ انصاف اور تہذیب کے اصولوں کو برقرار رکھا جا سکے۔” انہوں نے تشویش ظاہر کی کہ جیل میں عمران خان کی بینائی متاثر ہونے اور ان کے اہل خانہ سے ملاقاتوں پر پابندی کی رپورٹس انتہائی پریشان کن ہیں۔سابق کپتانوں نے پاکستان حکام سے درخواست کی ہے کہ تہذیب، عدل اور انصاف کے اصولوں کو برقرار رکھتے ہوئے عمران خان کے ساتھ احترام سے پیش آئیں۔ یہ اپیل کھیل کی روح اور انسانیت کے جذبے سے کی گئی ہے۔
دستخط کرنے والے:
ہندوستان: سنیل گواسکر، کپل دیو
آسٹریلیا: ایلن بارڈر، گریگ چیپل، ایان چیپل، اسٹیو وا، بیلنڈا کلارک اور کم ہیوز
انگلینڈ: مائیکل اتھرٹن، مائیکل بریئرلی، ڈیوڈ گاور اور ناصر حسین
ویسٹ انڈیز: سر کلائیو لائیڈ
نیوزی لینڈ: جان رائٹ
0
