نئی دہلی، 10 مئی : کنفیڈریشن آف انڈین انڈسٹری (سی آئی آئی) نے اتوار کو بتایا کہ ہندوستان کی نجی سرمایہ کاری ستمبر 2024 کے 4.6 لاکھ کروڑ روپے سے بڑھ کر ستمبر 2025 میں 67 فیصد اضافے کے ساتھ 7.7 لاکھ کروڑ روپے پر پہنچ گئی ہے۔ یہ ملک کے سرمایہ کاری کے چکر میں وسیع اور مضبوط بہتری کا اب تک کا سب سے فیصلہ کن اشارہ ہے۔
سی آئی آئی نے مغربی ایشیا کے بحران کے دوران اور اس کے بعد کے لیے صنعت کے شعبے کی خاطر ایک پانچ نکاتی ایکشن پلان بھی پیش کیا ہے، جس میں پیٹرول اور ڈیزل پر مرکزی ایکسائز ڈیوٹی میں مارچ میں کی گئی کٹوتی کو مرحلہ وار طریقے سے واپس لینا بھی شامل ہے۔ اس کے علاوہ اس نے صنعت کے ذریعے رضاکارانہ توانائی کے تحفظ کا معاہدہ، ایم ایس ایم ای ادائیگیوں کی 45 دن کی گارنٹی، سپلائی چین کی سکیورٹی کے ساتھ گہری درآمدی متبادل، اور نجی سرمایہ کاری کو وقت سے پہلے بڑھانے کے ساتھ رضاکارانہ قیمتوں میں اعتدال اور انٹرنشپ میں اضافے کا مشورہ دیا ہے۔
صنعتی تنظیم نے تقریباً 1,200 کمپنیوں کے اعداد و شمار کے تجزیے کی بنیاد پر بتایا کہ نجی شعبے کی سرمایہ کاری — جسے خالص مستقل اثاثوں اور زیر تعمیر کاموں میں سالانہ تبدیلی کے طور پر ماپا گیا — ستمبر 2025 میں بڑھ کر 7.7 لاکھ کروڑ روپے ہو گئی۔ یہ ایک سال پہلے کے 4.6 لاکھ کروڑ روپے کے مقابلے میں 67 فیصد زیادہ ہے۔
اس اضافے میں مینوفیکچرنگ سیکٹر نے اہم رول ادا کیا اور کل نجی سرمایہ کاری کا تقریباً نصف، یعنی 3.8 لاکھ کروڑ روپے کا حصہ ڈالا۔ اس میں دھات، آٹوموبائل اور کیمیکل کے شعبے سب سے آگے رہے۔ سروس سیکٹر نے تقریباً 40 فیصد یعنی 3.1 لاکھ کروڑ روپے کا حصہ ڈالا، جس کی قیادت تجارت، مواصلات اور آئی ٹی/ آئی ٹی ای ایس کے شعبوں نے کی۔
سی آئی آئی کے ڈائریکٹر جنرل چندرجیت بنرجی نے کہا کہ نجی سرمایہ کاری میں 67 فیصد کا اضافہ اس بات کا اب تک کا سب سے اہم اشارہ ہے کہ ہندوستان کی سرمایہ کاری کا سلسلہ فیصلہ کن طور پر بدل چکا ہے۔ صلاحیت کے استعمال کی شرح 75.6 فیصد تک پہنچنے، آرڈر بک میں 10 فیصد سے زیادہ اضافے اور مالی سال 26-2025 کی دوسری ششماہی میں بینک قرضوں کی شرح نمو تقریباً 14 فیصد ہونے کے ساتھ، نجی شعبہ ایک دہائی سے زیادہ عرصے میں پہلی بار اتنے بڑے پیمانے اور وسیع سطح پر سرمایہ کاری کر رہا ہے۔
یو این آئی
