سرینگر 2 اپریل (عقاب نیوز ڈیسک)جموں و کشمیر کے خوراک، شہری رسدات و امور صارفین، ٹرانسپورٹ، انفارمیشن ٹیکنالوجی، سائنس و ٹیکنالوجی اور یوتھ سروسز اینڈ اسپورٹس کے وزیر ستیش شرما نے واضح کیا ہے کہ مرکز کے زیر انتظام علاقے میں ایل پی جی (رسوئی گیس) اور پیٹرولیم مصنوعات کی کوئی قلت نہیں ہے۔ منگل کے روز قانون ساز اسمبلی میں وقفہ صفر (Zero Hour) کے دوران سینئر قانون ساز ایم وائی تاریگامی کی جانب سے اٹھائے گئے ایک اہم مسئلے کا جواب دیتے ہوئے، انہوں نے ایوان کو ایندھن کی موجودہ صورتحال سے آگاہ کیا۔
وزیر موصوف نے ایوان کو یقین دلایا کہ حکومتی سطح پر ایندھن کی بلا تعطل فراہمی کو یقینی بنانے کے لیے تمام ضروری اقدامات کیے گئے ہیں اور اس وقت پیٹرولیم مصنوعات اور رسوئی گیس کی مناسب اور وافر مقدار دستیاب ہے۔ انہوں نے عوام سے خصوصی اپیل کی کہ وہ کسی بھی قسم کی گھبراہٹ کا شکار ہو کر ایل پی جی سلنڈروں کی غیر ضروری پیشگی بکنگ (پینک بکنگ) سے گریز کریں، کیونکہ سپلائی کا نظام معمول کے مطابق خوش اسلوبی سے کام کر رہا ہے اور مستقبل قریب میں بھی کسی قلت کا کوئی امکان نہیں ہے۔
0
