سرینگر، 07 مئی (عقاب نیوز ڈیسک): کرائم برانچ جموں و کشمیر کے اکنامک آفنسز ونگ (ای او ڈبلیو) کشمیر نے ایچ ڈی ایف سی بینک کی شوپیاں برانچ میں ہونے والے بڑے مالی فراڈ کیس میں 11 ملزمان کے خلاف جوڈیشل مجسٹریٹ فرسٹ کلاس، شوپیاں کی عدالت میں چارج شیٹ دائر کر دی، حکام نے جمعرات کو یہ اطلاع دی۔
جاری ایک بیان میں ترجمان نے بتایا کہ کرائم برانچ جموں و کشمیر کے اکنامک آفنسز ونگ (ای او ڈبلیو) کشمیر نے ایف آئی آر نمبر 30/2025 میں جوڈیشل مجسٹریٹ فرسٹ کلاس، شوپیاں کی عدالت میں چارج شیٹ پیش کی ہے۔ پولیس اسٹیشن ای او ڈبلیو کشمیر میں بھارتیہ نیایا سنہتا اور آئی ٹی ایکٹ کی متعلقہ دفعات کے تحت درج یہ مقدمہ ایچ ڈی ایف سی بینک کی شوپیاں برانچ میں ہونے والے بڑے پیمانے کے مالی فراڈ سے متعلق ہے۔
انہوں نے کہا کہ یہ معاملہ مالی بے ضابطگیوں سے متعلق ایک تحریری شکایت کے بعد سامنے آیا، جس کے بعد پی ایچ کیو جموں و کشمیر کی ہدایات پر کیس کو گہری تحقیقات کے لیے کرائم برانچ جموں و کشمیر کو منتقل کر دیا گیا۔
“تحقیقات کے دوران کئی افراد کی مبینہ ملوث ہونے کی نشاندہی کی گئی، جن میں شامل ہیں: عادل ایوب گنائی، ولد محمد ایوب گنائی، ساکن ممندر، شوپیاں؛ عارضی رہائش حمزہ کالونی، باغ کانی پورہ، نوگام (ایچ ڈی ایف سی بینک، برانچ مینیجر پلوامہ/شوپیاں)۔ عرفان مجید زرگر، ولد عبدالمجید زرگر، ساکن شیخ محلہ، بونیگام، شوپیاں (ایچ ڈی ایف سی بینک، برانچ مینیجر پلوامہ/شوپیاں)۔ مبشر حسین شیخ، ولد غلام محمد شیخ، ساکن کرینہ، کلگام (ایچ ڈی ایف سی بینک شوپیاں کے سابق ملازم)۔ زید منظور، ولد منظور احمد دین، ساکن ڈگرپورہ، خانبل، اننت ناگ (ایچ ڈی ایف سی بینک پلوامہ کے سابق ملازم)۔ جاوید احمد بھٹ، ولد عبدالرحیم بھٹ، ساکن بیلو راجپورہ، پلوامہ (ایچ ڈی ایف سی بینک پلوامہ/شوپیاں کے سابق ملازم)۔”
“مذکورہ بالا افراد کو 18 فروری 2026 کو گرفتار کیا گیا تھا اور وہ اس وقت سے عدالتی تحویل میں ہیں۔ تحقیقات مکمل ہونے پر مجموعی طور پر 11 ملزمان کے خلاف چارج شیٹ معزز عدالت میں عدالتی فیصلے کے لیے پیش کر دی گئی ہے،” ترجمان نے کہا۔ — (کے این او)
