ماسکو، 31 مارچ (یو این آئی) امریکی بینک جے پی مورگن کے چیف اکانومسٹ بروس کاسمین کا ماننا ہے کہ اگر آبنائے ہرمز مزید ایک ماہ تک بند رہی تو تیل کی قیمتیں 150 ڈالر فی بیرل تک پہنچ سکتی ہیں۔
برطانوی اخبار ‘دی ٹائمز’ کے مطابق کاسمین نے کہا کہ ‘اگر آبنائے ہرمز مزید ایک ماہ تک بند رہتی ہے تو تیل کی قیمتیں 150 ڈالر فی بیرل کے قریب جا سکتی ہیں اور توانائی استعمال کرنے والی صنعتوں کے لیے سپلائی کی بندش کا باعث بن سکتی ہے۔’
فروری 28 کو امریکہ اور اسرائیل نے تہران سمیت ایران میں مختلف اہداف پر حملے شروع کیے جس سے جانی و مالی نقصان ہوا، جس کے جواب میں ایران نے اسرائیلی سرزمین اور مشرق وسطیٰ میں امریکی فوجی اہداف کو نشانہ بنایا۔
اس بڑھتی ہوئی کشیدگی کے باعث آبنائے ہرمز سے جہاز رانی عملی طور پر رک گئی ہے، جو خلیجی ممالک سے عالمی منڈیوں تک تیل اور مائع قدرتی گیس کی فراہمی کا ایک اہم راستہ ہے اور اس ناکہ بندی کے نتیجے میں دنیا کے بیشتر ممالک میں ایندھن کی قیمتوں میں مسلسل اضافہ ہو رہا ہے جو عالمی معیشت کے لیے ایک بڑا چیلنج بنتا جا رہا ہے۔
