جموں، 22 اپریل: (عقاب ویب ڈیسک) جموں اور سرینگر کے درمیان براہ راست ٹرین سروس کا طویل انتظار بالآخر 30 اپریل کو ختم ہونے جا رہا ہے۔ اس تاریخی دن وزیر ریلوے اشونی ویشنو، پی ایم او میں مرکزی وزیر مملکت ڈاکٹر جتیندر سنگھ کے ہمراہ، جموں ریلوے اسٹیشن سے وادی کشمیر کے لیے ’وندے بھارت ایکسپریس‘ ٹرین کو ہری جھنڈی دکھا کر روانہ کریں گے۔ سرکاری ذرائع کے مطابق، پٹریوں اور ٹرینوں کے کامیاب ٹرائل کے بعد سیکیورٹی سمیت تمام انتظامات کو حتمی شکل دے دی گئی ہے۔
اس وقت کٹرا اور سرینگر کے درمیان چلنے والی دو وندے بھارت ٹرینوں کی سروس کو اب جموں تک بڑھا دیا جائے گا، جس کے لیے ریلوے محکمہ جلد ہی نئے اوقات کار جاری کرے گا۔ یہ سروس جموں اور سرینگر کے درمیان سفری وقت کو نمایاں طور پر کم کر دے گی، جس سے نہ صرف مقامی لوگوں بلکہ ملک بھر سے آنے والے سیاحوں اور مسافروں کو بھی بڑی سہولت میسر آئے گی۔
براہ راست ٹرین سروس کا آغاز سول سیکرٹریٹ کی سرینگر منتقلی (دربار موو) سے عین قبل ہو رہا ہے، جو ملازمین کے لیے کافی مددگار ثابت ہوگا۔ اس کے علاوہ، 3 جولائی سے شروع ہونے والی سالانہ شری امرناتھ جی یاترا کے پیش نظر بھی یہ ٹرین سروس یاتریوں کے لیے ایک اہم متبادل فراہم کرے گی۔ خاص طور پر خراب موسم میں جب قومی شاہراہ بند ہو جاتی ہے، یہ ریلوے لنک دونوں خطوں کے درمیان رابطے کا ایک بہترین ذریعہ ثابت ہوگا۔
یاد رہے کہ وزیر اعظم نریندر مودی نے 6 جون 2025 کو کٹرا اور سرینگر کے درمیان پہلی براہ راست ٹرین کا افتتاح کیا تھا۔ اب اس سروس کو جموں تاوی تک وسعت دی جا رہی ہے، جس کے لیے ممکنہ طور پر 8 کوچز کے بجائے 20 کوچز والی اپ گریڈڈ وندے بھارت ریک کا استعمال کیا جائے گا۔ جموں ریلوے ڈویژن، جس نے گزشتہ سال سے اپنے آپریشنز کا آغاز کیا ہے، اس اہم سنگ میل کے لیے پوری طرح تیار ہے۔
0
