امریکہ-ایران امن مذاکرات کی امید پر شیئر بازار میں زبردست اچھال

ممبئی، 4 مارچ : امریکہ اور ایران کے درمیان امن مذاکرات کی نئی امید پیدا ہونے کے باعث پیر کے روز ابتدائی کاروبار میں شیئر بازاروں میں زبردست تیزی دیکھی گئی۔
بی ایس ای کا سینسیکس 343.77 پوائنٹس کی برتری کے ساتھ 77,257.27 پوائنٹس پر کھلا۔ تازہ ترین اطلاع کے مطابق، یہ 813.04 پوائنٹس (1.06 فیصد) اضافے کے ساتھ 77,726.54 کی سطح پر پہنچ چکا ہے۔ نیشنل اسٹاک ایکسچینج کا نفٹی-50 انڈیکس بھی 66 پوائنٹس کی مضبوطی کے ساتھ 24,063.55 پر کھلا اور فی الحال 241.20 پوائنٹس (1.01 فیصد) اوپر 24,238.75 پر کاروبار کر رہا ہے۔
امریکی صدر ڈونلڈ ٹرمپ کی جانب سے ایران کی نئی تجویز کی تعریف اور اس کے باقاعدہ ڈرافٹ کے انتظار کے بیان نے سرمایہ کاروں میں نیا جوش بھر دیا ہے۔ اس مثبت عالمی اشارے کے باعث دیگر ایشیائی بازاروں کے ساتھ ساتھ بھارتی شیئر بازاروں میں بھی خریداری کا رجحان غالب ہے۔
بازار میں ہمہ جہت خریداری کے درمیان آٹو، کیمیکلز، ریئلٹی اور ایف ایم سی جی سیکٹرز میں سب سے زیادہ تیزی دیکھی جا رہی ہے۔ اس کے علاوہ فنانس، بینکنگ اور میٹل سیکٹرز میں بھی اچھی مضبوطی برقرار ہے۔
ماروتی سوزوکی: ساڑھے چار فیصد کے اضافے کے ساتھ سرفہرست ہے۔ ہندوستان یونی لیور: پونے چار فیصد کی برتری۔ اڈانی پورٹس اور ایل اینڈ ٹی: ڈھائی ڈھائی فیصد کا اضافہ۔ مہندرا اینڈ مہندرا اور ایشین پینٹس: دو دو فیصد کی مضبوطی۔ ایچ ڈی ایف سی بینک، ایکسس بینک، آئی سی آئی سی آئی بینک اور اسٹیٹ بینک آف انڈیا کے شیئرز بھی ایک فیصد سے زائد کی برتری حاصل کر چکے ہیں۔ اس کے علاوہ ٹاٹا اسٹیل اور انڈیگو کے شیئرز میں بھی مثبت رجحان دیکھا جا رہا ہے۔
یو این آئی