سری نگر، : قائد حزب اختلاف (ایل او پی) اور بھارتیہ جنتا پارٹی (بی جے پی) کے سینئر رہنما سنیل شرما نے ہفتہ کے روز الزام عائد کیا کہ نیشنل کانفرنس اندرونی “بیماری” کی وجہ سے “وینٹی لیٹر” پر ہے اور خبردار کیا کہ کسی بھی “توسیع” سے پارٹی عمودی طور پر تقسیم ہو جائے گی۔
خبر رساں ایجنسی کشمیر نیوز سروس (کے این ایس) سے بات کرتے ہوئے بی جے پی کے سینئر رہنما نے دعویٰ کیا کہ صرف چند افراد، جنہیں بی جے پی کے خلاف بولنے کی ذمہ داری دی گئی ہے، این سی کی اندرونی صحت کو متاثر کرنے کے ذمہ دار ہیں۔ انہوں نے این سی ہیڈکوارٹر نوائے صبح میں حالیہ احتجاج کو بھی بڑھتے ہوئے بحران سے جوڑا۔
انہوں نے کہا، “این سی ہیڈکوارٹر میں جو کچھ ہوا، وہ انہی لوگوں کی وجہ سے ہوا جنہیں ہمارے خلاف بولنے کی ڈیوٹی دی گئی ہے۔ یہی اس بیماری کی وجہ ہے۔”
ایل او پی شرما نے دعویٰ کیا کہ یہ بیماری اب لاعلاج ہو چکی ہے۔ انہوں نے کہا، “اگر وہ معمولی سی بھی توسیع کریں گے تو دو دھڑے بن جائیں گے۔ نیشنل کانفرنس دو حصوں میں تقسیم ہو جائے گی۔ یہ ایک تھیلے کی طرح بکھر جائے گی۔ بیماری اس قدر گہری ہو چکی ہے کہ اس کا کوئی علاج نہیں۔”
انہوں نے شیو سینا کی تقسیم کا حوالہ دیتے ہوئے کہا کہ پارٹی نے خود ہی یہ بحران پیدا کیا۔
انہوں نے کہا، “دو شیو سینائیں خود انہوں نے بنائیں۔ چاہے جتنی بھی کوشش کر لیں، گھر ٹوٹ چکا ہے۔ اس میں ایک بڑا شگاف پڑ چکا ہے اور کسی بھی وقت آپ دیکھیں گے کہ یہ دیوار گر چکی ہے۔”
تاہم، انہوں نے اپنی جانب سے کسی بھی مداخلت کو مسترد کرتے ہوئے کہا، “نہ ہی ہم اس پر یقین رکھتے ہیں۔” (کے این ایس)
