سری نگر، 14 اپریل (یو این آئی) جموں و کشمیر میں منشیات کے خلاف جاری مہم کو مزید تیز کرنے کی تیاری کی جا رہی ہے، کیونکہ جموں و کشمیر پولیس نے آنے والے دنوں میں اس لعنت پر قابو پانے کے لیے اپنی کوششیں بڑھانے کا منصوبہ بنایا ہے۔
انسپکٹر جنرل آف پولیس (آئی جی پی) کشمیر، وی کے بردی نے منگل کے روز کہا کہ نشہ مکت ابھیان کے تحت ایک نئی مہم شروع کی جا رہی ہے، جس میں تمام متعلقہ محکموں، خاص طور پر پولیس کو ہدایت دی گئی ہے کہ وہ منشیات کے خلاف زیرو ٹالرنس (عدم برداشت) کی پالیسی اپنائیں۔
سری نگر کے ایک گوردوارے میں بیساکھی کی تقریبات کے موقع پر صحافیوں سے بات کرتے ہوئے آئی جی پی نے کہا کہ اس مہم کا مقصد موجودہ اور آنے والی نسلوں کو منشیات کی لت سے محفوظ رکھنا ہے۔
انہوں نے کہاکہ “منشیات کے خلاف مہم کئی سالوں سے جاری ہے، لیکن اب اسے نشہ مکت بھارت مہم کے تحت نئی رفتار دی جا رہی ہے۔ تمام اداروں، خاص طور پر پولیس کو ہدایت دی گئی ہے کہ وہ منشیات کے خلاف مکمل عدم برداشت کا مظاہرہ کریں۔”
انہوں نے مزید کہا کہ آنے والے دنوں میں قانون نافذ کرنے کے اقدامات میں نمایاں اضافہ کیا جائے گا اور پولیس منشیات فروشوں، اسمگلروں اور نشے میں ملوث افراد کے خلاف سخت ترین کارروائی کرے گی۔
سوپور میں ایک اسکول میں مبینہ جنسی زیادتی کے واقعے پر کل ہونے والے احتجاج کے بعد گرفتاریوں کے بارے میں پوچھے جانے پر آئی جی پی نے کہا کہ کچھ عناصر نے بدامنی پھیلانے کی کوشش کی اور قانون کو اپنے ہاتھ میں لیا۔
انہوں نے کہاکہ “میں واضح کرنا چاہتا ہوں کہ کل کے واقعے میں کچھ لوگوں نے بدامنی پھیلانے کی کوشش کی اور قانون کو اپنے ہاتھ میں لیا۔ ان کے خلاف قانونی کارروائی کی جائے گی۔”
انہوں نے کہا کہ تشدد میں ملوث افراد کا اسکول سے کوئی تعلق نہیں تھا اور وہ باہر سے آئے تھے تاکہ صورتحال کو خراب کریں۔
انہوں نے مزید کہاکہ “یہ وہ لوگ تھے جن کا اسکول سے کوئی تعلق نہیں تھا۔ اگر کوئی باہر سے آ کر امن کو خراب کرنے کی کوشش کرے گا تو جموں و کشمیر پولیس اس کے خلاف سخت کارروائی کرے گی۔”
یواین آئی
0
