جموں، 21 مئی :منوج سنہا نے بدھ کے روز کہا کہ نوجوان نسل کی غذائیت قوم کے مستقبل کی تشکیل کرے گی اور اس بات پر زور دیا کہ ہر اسکولی بچے کو متوازن اور غذائیت سے بھرپور خوراک تک رسائی حاصل ہونی چاہیے۔
اکشے پاترا فاؤنڈیشن کی مرکزی کچن سہولت کے سنگِ بنیاد کی تقریب سے خطاب کرتے ہوئے، جو کٹرا ضلع ریاسی میں قائم کی جا رہی ہے، سنہا نے کہا کہ یہ سہولت فعال ہونے کے بعد روزانہ 5,000 اسکولی بچوں کو غذائیت سے بھرپور کھانا فراہم کرے گی۔
اس موقع پر لیفٹیننٹ گورنر نے مرکز کے زیر انتظام علاقے میں اکشے پاترا کے آئندہ منصوبوں کا بھی ذکر کیا، جن میں جموں میں ایک نئی کچن سہولت کا قیام شامل ہے۔
انہوں نے کہاکہ “میں حکومت اور سماجی تنظیموں کے درمیان مضبوط تعاون کی اپیل کرتا ہوں تاکہ نوجوان نسل کو بااختیار بنایا جا سکے۔ ہمیں یقینی بنانا ہوگا کہ اسکول کے بچوں کو متوازن اور غذائیت سے بھرپور کھانا ملے۔ ہر بچہ صحت مند خوراک کا حق دار ہے اور ہمیں یہ یقینی بنانا چاہیے کہ کوئی بھی بچہ پیچھے نہ رہ جائے۔”
لیفٹیننٹ گورنر نے عام زندگی میں انسان کی چھوڑی گئی میراث کے بارے میں بھی بات کی اور کہا کہ یہ تین سوالوں پر مبنی ہوتی ہے: ہم کیا تخلیق کر رہے ہیں؟ ہم کیا محفوظ کر رہے ہیں؟ اور ہم آئندہ نسلوں کو کیا سونپیں گے؟ انہوں نے مزید کہا کہ ایک اور اہم سوال یہ بھی ہونا چاہیے: “ہم اپنے بچوں کو کیا کھلا رہے ہیں؟”
انہوں نے کہا کہ بھوکا بچہ تعلیم حاصل نہیں کر سکتا، اور ایسا اسکول جو اپنے بچوں کو کھانا فراہم نہ کر سکے، مساوی ترقی کے مواقع پیدا کرنے کا دعویٰ نہیں کر سکتا۔ ان کے مطابق، کئی دہائیوں کی عالمی تحقیق نے ثابت کیا ہے کہ غذائیت اور تعلیم الگ چیزیں نہیں بلکہ اچھی غذائیت ہی تعلیم کی بنیاد ہے۔
سنہا نے کہاکہ “جو بچے متوازن اور غذائیت سے بھرپور غذا کھاتے ہیں، وہ بہتر توجہ دیتے ہیں، معلومات کو زیادہ مؤثر انداز میں یاد رکھتے ہیں، اور کلاس میں زیادہ سرگرمی سے حصہ لیتے ہیں۔ پروٹین، وٹامنز اور متوازن غذا بچے کی سوچنے اور سمجھنے کی صلاحیت کے لیے ضروری توانائی فراہم کرتے ہیں۔ میں چاہتا ہوں کہ جموں و کشمیر کا ہر اسکول یہ بات یاد رکھے کہ جب ہم اسکولوں میں غذائیت سے بھرپور کھانا فراہم کرتے ہیں تو ہم صرف پیٹ نہیں بھر رہے ہوتے بلکہ مستقبل کی سوچ کی تشکیل کر رہے ہوتے ہیں۔”
انہوں نے مزید کہاکہ “اگلی نسل صرف ہمارا مستقبل نہیں بلکہ ان خوابوں اور امیدوں کا زندہ اظہار ہے جنہیں ہم بطور قوم تعمیر کرنا چاہتے ہیں۔ ان کی تعلیم، صحت اور اعتماد ہماری مشترکہ ذمہ داری ہے۔ آج ہم بچوں میں جو اقدار، علم اور یقین پیدا کریں گے، وہ آنے والے عشروں میں جموں و کشمیر اور ہندوستان کے مستقبل کو تشکیل دیں گے۔”
یواین آئی۔
0
