جموں،30دسمبر(یو این آئی)چناب ویلی کے پہاڑی علاقوں میں جاری وسیع دہشت گرد مخالف آپریشن کے بیچ فوج نے زمینی سطح پر سیکیورٹی کو مضبوط بنانے کی غرض سے ڈوڈہ ضلع میں ولیج ڈیفنس گارڈز کی تربیتی سرگرمیوں میں تیزی پیدا کردی ہے۔ حکام نے منگل کو بتایا کہ یہ تربیت ایسے وقت میں دی جارہی ہے جب خطے کے جنگلاتی اور دشوارگزار پہاڑی علاقوں میں مشتبہ دہشت گردوں کی نقل و حرکت کے پیش نظر سرچ آپریشنز مسلسل جاری ہیں۔
سرکاری ذرائع کے مطابق ڈوڈہ-چمبا سرحد سے ملحقہ 17 دور افتادہ دیہات سے تعلق رکھنے والے تقریباً 150 وی ڈی جی رضاکار—جن میں خواتین بھی شامل ہیں—خودکار رائفلوں کی ہینڈلنگ، ہلکی جنگی حکمت عملی، خود دفاع، بنکر سازی اور دشمن حملوں کا مقابلہ کرنے کی عملی تربیت حاصل کر رہے ہیں۔
یہ تربیت بھلیسہ کے شنگنی پنچایت میں دی جا رہی ہے، جو ضلع ہیڈکوارٹر سے تقریباً 90 کلومیٹر دور واقع ہے۔ حکام کے مطابق اس اقدام کا مقصد حساس علاقوں میں مقامی رضاکاروں کو پہلی دفاعی لائن کے طور پر تیار رکھنا ہے تاکہ کسی بھی ہنگامی صورتحال میں وہ اپنے گاؤں کا تحفظ کر سکیں۔
فوج، پولیس اور نیم فوجی دستے اس وقت چناب ویلی کے بالائی علاقوں—خاص طور پر ڈوڈہ اور کشتواڑ—میں اُن درانداز دہشت گردوں کی تلاش میں مصروف ہیں جو پچھلے چند برسوں میں گھنے جنگلات میں ٹھکانے بنانے میں کامیاب ہوئے تھے۔
وی ڈی جی اراکین نے جدید تربیت اور حالیہ ہتھیاری اپ گریڈیشن پر خوشی کا اظہار کیا ہے۔ مرکزی وزیر داخلہ امیت شاہ کی جانب سے وی ڈی جیز کو جدید سیلف لوڈنگ رائفلز فراہم کیے جانے پر رضاکاروں نے اطمینان ظاہر کیا اور کہا کہ اس سے ان کا حوصلہ کئی گنا بڑھ گیا ہے۔
وی ڈی جی رکن سریندر سنگھ نے کہا:’یہ تربیت ہمارے لیے بہت بڑی سہولت ہے۔ ہمیں ہتھیار چلانے، بنکر بنانے اور خود کو محفوظ رکھنے کے طریقے سکھائے جا رہے ہیں۔ ایسے پروگراموں کا ہمارے گاؤں تک پہنچنا قابل ستائش ہے۔‘
گوالہ گاؤں کے رہائشی راجیش کمار ٹھاکر نے بتایا کہ پہلے ان کے پاس صرف .303 رائفلیں تھیں، تاہم جدید ہتھیار ملنے کے بعد اُن کا اعتماد بڑھ گیا ہے۔’اب ہم زیادہ محفوظ محسوس کر رہے ہیں اور اپنے گاؤں کا دفاع بہتر طریقے سے کر سکتے ہیں۔ امید ہے حکومت مزید خودکار ہتھیار بھی فراہم کرے گی‘۔
سیکیورٹی حکام کے مطابق وی ڈی جیز کو مضبوط کرنا اور بالائی علاقوں میں جاری مشترکہ سرچ آپریشنز چناب ویلی میں دہشت گردی کے خلاف کثیر سطحی سیکیورٹی حکمت عملی کا حصہ ہیں، جس کا مقصد دہشت گردوں کی سپورٹ بیس مکمل طور پر ختم کرنا اور خطے میں دیرپا امن کو یقینی بنانا ہے۔
0
