سرینگر، 23 مئی/ شمالی کشمیر کے رضدان ٹاپ اور دیگر بالائی علاقوں میں ہفتہ کو تازہ برفباری ریکارڈ کی گئی، جبکہ وادی کشمیر کے متعدد میدانی علاقوں میں بارش اور ژالہ باری ہوئی، جس کے نتیجے میں باغات، سبزیوں کے کھیتوں اور کھڑی فصلوں کو نقصان پہنچنے کی اطلاعات موصول ہوئی ہیں۔
نیوز ایجنسی کشمیر نیوز آبزرور (کے این او) کو دستیاب تفصیلات کے مطابق، جموں و کشمیر میں سرگرم مغربی تغیر (ویسٹرن ڈسٹربنس) کے باعث شروع ہونے والی تازہ موسمی سرگرمی کے نتیجے میں رضدان ٹاپ اور تولیل وادی کے بالائی علاقوں میں تازہ برفباری ہوئی، جبکہ دن بھر وادی کے کئی میدانی اضلاع میں بارش کا سلسلہ جاری رہا۔
تفصیلات کے مطابق شمالی کشمیر کے بعض علاقوں میں تیز ہواؤں کے ساتھ ژالہ باری ہوئی، جس سے سیب کے باغات، سبزیوں کے کھیتوں اور دیگر کھڑی فصلوں کو نقصان پہنچا۔
حکام کے مطابق بعض متاثرہ دیہات سے نقصانات کی اطلاعات موصول ہوئی ہیں اور متعلقہ ٹیمیں زمینی سطح پر جائزہ لے کر نقصانات کا تخمینہ لگائیں گی۔ موسمی سرگرمی کے باعث کئی نشیبی علاقوں میں پانی جمع ہوگیا، جبکہ شدید بارش کے دوران متعدد سڑکوں پر ٹریفک کی روانی بھی متاثر رہی۔
ادھر محکمہ موسمیات نے پیش گوئی کی ہے کہ آئندہ چند روز تک موسم غیر مستحکم رہنے کا امکان ہے۔
محکمہ کے مطابق 23 سے 25 مئی کے دوران صبح کے اوقات میں عموماً خشک موسم متوقع ہے، تاہم دوپہر کے بعد مختلف مقامات پر وقفے وقفے سے ہلکی بارش یا بوندا باندی ہوسکتی ہے۔
26 سے 28 مئی تک جموں و کشمیر میں موسم زیادہ تر گرم اور خشک رہنے کی توقع ہے، جبکہ 29 سے 31 مئی کے درمیان چند مقامات پر مختصر بارش کا امکان ظاہر کیا گیا ہے۔
محکمہ موسمیات نے عوام، بالخصوص حساس اور پہاڑی علاقوں میں رہنے والے افراد کو گرج چمک، تیز ہواؤں اور ژالہ باری کے دوران احتیاطی تدابیر اختیار کرنے کی ہدایت دی ہے.
